بني خلاد

بني خلاد

لأن الانسانيّة لا تتجزّأ

تحيا بني خلاد وتعيش، أرضي وبلادي وبلاد أجدادي، فيها كبرت وفيها تربّيت ومهما ما نغيب عليها لازم نرجعلها

تحيا بني خلاد وتتنفس كي نسرعوا في إنجاز الطريق الحزامية سيدي الجديدي طريق قربة مرورا بسيدي التومي, الطريق هذا بش ينقّص مالإختناق المروري خاصة وقت دخول وخروج التلامذة من مدرسة العربي زروق ومدرسة التحرير ونهار الجمعة والسبت زادة أيام إنتصاب السوق الأسبوعية.

على الرغم من أنها معتمدية صغيرة في المساحة إلا أن بني خلاد تستقطب العديد من العائلات اللي يجيو ويستقرّوا فيها وهذا فخر لينا وفخر لمدينتنا ولكن إرتفاع سكان بني خلاد خلق ضغط عالمعاهد والمدارس وأثر على مردوديتها مثلا المعهد الثانوي بنهج المنزه كان يحتل المرتبة الثالثة جهويا واليوم أصبح في أواخر الترتيب المعاهد وهذا مؤسف خاصة في قطاع حيوي كيما التعليم اللي يكون أولادنا وبناتنا.

 

عمادات بني خلاد تعاني من العطش وعلى الرغم من أن الماء حق دستوري إلا أنو ديما مقصوص في بير دراسن وحنّوس ومزنين، المشكل اللي ما طورناش طريقتنا في تعاملنا مع الثروة المائية ولازلنا نعوّلو على المجامع المائية اللي للأسف ما تفضّش المشكل, لازم الدولة تتّخذ قرار بتزويد الوسط الريفي بالماء الصالح للشراب عبر مسالك الشركة الوطنية لإستغلال وتوزيع المياه La Sonede

بني خلاد تحيا وتعيش كي نفعّلو المنطقة الصناعية بسيدي التومي ونوضحو المسألة العقارية للمقاسم الإجتماعية ونغيّرو الصبغة الفلاحية للأراضي الدولية، تحيا بني خلاد وتتطور بنيتها التحتية وتتفك عنها العزلة اللي تعيش فيها،

تحيا بني خلاد وتعيش كي نطوروا القطاع الفلاحي بالمنطقة ونحلّوا المشاكل العقارية للأراضي الفلاحية ونوزعوا المقاسم على شباب الجهة بش يستثمر في كل العمادات : في بني خلاد وفي بير دراسن وفي  زاوية الجديدي وحنّوس والقبّة وسيدي التومي.

برنامجي لبني خلاد يتلخّص في :

  1. تحسين الدراسة المتعلقة بالطريق الحزامية زاوية الجديدي طريق قربة.
  2. تعميم التزوّد بالماء الصالح للشراب في كل عمادات بني خلاد.
  3. العمل على إدراج إعتمادات إضافية لتوسعة المعهد الثانوي بنهج المنزه أو لإحداث معهد ثانوي جديد.
  4. التسريع في نشر الأوامر التطبيقية للأراضي الفلاحية.